Kiiska Luul: Waxa ka dhacay gudaha Maxkamada Gobolka Banaadir iyo kiisaska lagu xasuusto qareenka eedeysanaha

 Dheggaysiga dacwadda kiiska Luul Sheekh Cabdicasiis oo u geeriyootay dhaawacyo kasoo gaaray dab ayaa lasoo gebogebeeyay.

Dhageysiga dacwada oo bilaabatay toddobaadkii hore ayaa dacwad-oogeyaashu kusoo bandhigeen eeda loo heysta ninka qabay gabadha oo ay ku eedeeyay in uu gubay xaaskiisa islamarkaas na uu masuul ka yahay dilkeeda.

Qareemada difaacayay eedeysanaha oo laga soo qabtay goboladda dhexe ayaa ka difaacay eedaha iyaga oo doonaya in la siidaayo islamarkaas na aan lagu xukumin eedaha dacwada-oogaha oo ah in uu geystay dilka.

Eedeysanaha iyo dadka ay marqaati ahaan u keeneen dacwad-oogeyaasha xafiiska xeer-ilaalinta ayaa su’aalo lagu weydeeyay xarunta maxkamada gobolka Banaadir oo laga filayo inay go’aan ka gaarto kiiskan oo noociisu yahay dhif iyo nadir.

Waxa laga og yahay kiiska ilaa iyo hadda

Luul Sheekh Cabdicasiis oo ah hooyo ka tagtay afar carruur ah oo aabbehood horey u geeriyooday waxay u shaqeyneysay dowladda Soomaaliya, si gaar ah garoonka diyaaradaha ee Caalamiga ah ee Aadan Cabdulle.

Waxay geeriyootay labadii Feberaayo kadib dhaawacyo kasoo gaaray dab qabsadya guriga ee ay degeneyd oo lagu eedeeyay in uu ka dambeeyay ninka ay u dhaxday.

Waxay ku geeriyootay isbitaalka Erdogan ee horey loo dhehi jiray Digfeer oo la geeyay maalmo kadib markii ay dhaawacyada kasoo gaareen dabka.

Ka hor waxaa lagu hayay dhowr isbitaal oo kale oo lagu dabiibayay xaaladeedda.

Booliska iyo xafiiska xeer-ilaalinta ee dowladda federaalka ayaa la wareegay kiiska iyaga oo baaritaano sameeyay kahor inta aanan lasoo qaban eedeysanaha oo ay Boolisku shaaciyeen in uu baxsad yahay.

Qoyska gabadha ayaa diiday inay qaataan mag ama lagu xaliyo kiiskan xeerka iyo dhaqanka, iyaga oo doorbiday in loo daayo hay'adda cadaalada iyo garsoorka Soomaaliya.

Meydka Luul weli lama aasin, oo waxa uu muddo bil dhan ku jiraa talaagad loogu talogalay in lagu hayo meydka.

Qoysku waxay doonayaan inay gabadhooda aasaan kadib marka uu dhaco xukunka maxkmadda oo hadda laga warsugayo.

Waxa ka dhacay maxkamada maalmaha uu socday dhegeysiga dacwada

Weli lama aasin meydka Luul Sheekh Cabdicasiis oo sugaya go'aanka maxkamada

Marka laga soo tago dhegeysiga doodaha iyo xogaha ay soo bandhigayeen xafiiska xeer-ilaalinta ee dacwada kusoo oogay eedeysanaha iyo qareemada ka difaacayay, waxaa kale oo maxkamada la hor keenay agab lagu tilmaamay inay yihiin haraadiga telfoonada ay marxuumadu adeegsan jirtay ee ku baaba'ay dabka, iyo cadeymo kale oo ay boolisku sheegeen inay ka qaadeen goobta uu dabku ka dhacay.

Waxaa kale oo maxkamada la horkeenay dad markhaatiyaal ah oo sheegayay wixii ay arkeen dabka kahor iyo kadib, iyo sida ay wax u dhaceen inta ay ogaan kareen.

Eedeysanaha oo ah seyga u dhaxday Luul Sheekh Cabdicasiis waxa uu qirtay in uu isagu gubay guriga kadib dood dhex martay isaga iyo xaaskiisa oo uu sheegay inay ka dalbatay furiin.

Waxaa kale oo uu sheegay in uu ka hinaasay xaaskiisa, laakiin waxa uu iska fogeeyay in uu gubay xaaskiisa oo ay dacwad-oogeyaashu ku eedeeyeen.

Dacwada oo toos looga daawanayay internetka waxa uu eedeysanaha ku sheegay in uu jeclaa xaaskiisa, islamarkaas na uusan marba dab ku taaban iyada iyo qolka ay ku jirtay kahor inta uusan demb qabadsiin qeyb kale oo dabka ka mid ah.

Qareemada difaacayay eedeysanaha waxay sheegeen in geerida Luul Sheekh Cabdicasiis aysan wax raad ah ku lahayn ninka ay difaacayeen, iyaga oo sheegay inay u dhimatay sababo kale oo ay ka mid yihiin biyihii dabka looga damiyay, iyo daryeel xumo caafimaad.

Dacwad-oogeyaasha ayaa dhankooda ku eedeeyay eedeysanaha in uu si ku talo-gal ah uu dab-u-qabsiiyay xaaskiisa, iyaga oo caddeyn ka dhiganaya dabka eedeysanaha ka gaaray gacanta midig oo uu ka dhaawacan yahay.

Qareen Cali Xalane iyo kiiska horey usoo maray

Cali Xalane waa qareenka u doodaya eedeysanaha

Difaaca ugu weyn ee eedeysanaha waxaa uu ahaa qareenka caanka ah ee Cali Xalane oo horey loogu yaqaanay kiisas kale oo waa weyn.

Dad badan oo baraha bulshada adeegsada ayaa ku eedeeyay in aysan sax ahayn in uu difaaco u noqdo qareenka, iyaga oo hilmaamsan inay tahay xaq sharci ah in qofwalba uu helo qareen iyada oo la eegeyn waxa uu ku eedeysan yahay.

Waxa uu horey qareen ugu ahaa weriyeyaal ay dowladdu xirtay iyo dad ku eedeysan dacwado kale.

Waxaa ka mid ah Agaasimaha Wasaaradda Shaqada iyo Arrimaha Bulshada Soomaaliya oo loo xidhay musuqmaasuq lagu soo eedeeyay.

Qareen Cali Xalane waxa uu ku guuleystay in maxkamadu dembi ku wayso agaasimaha kadib muddo sideed bil ah oo uu xirnaa isaga oo ka difaacay dhammaan dacwadii lagu soo